www.HAYOL.uz / N1 - Biz Bilan Xammasi Oson!

Shimoliy Koreya rahbari pochchasini

itlarga tiriklayin yem qildi

Xitoy davlat gazetasi Wen Wei Po chop etgan yangi maqolada Koreya Xalq Demokratik Respublikasi yetakchisi Kim Chen In tomonidan uning pochchasi qanday qatl etilgani batafsil bayon qilingan. Ularning ta’kidlashicha, davlat rahbarining pochchasi Chan Son Txek tiriklay itlarga yem qilingan.Wen Wei Po ma’lumotlariga qaraganda, mamlakat yetakchisining pochchasi hamda ayni ish bo‘yicha ayblangan yana besh kishi uch kundan buyon ochlikda saqlangan 120 ta it orasiga tashlangan. Nashrning ta’kidlashicha, qatl jarayoni bir soatga yaqin davom etgan va yuzlab Shimoliy Koreya amaldorlari ko‘z oldida amalga oshirilgan.

Ammo KXDR yoki mustaqil manbalar tomonidan mazkur ma’lumotni tasdiqlovchi rasmiy ma’lumot hozircha berilmagan. Bir qator nashrlar, ushbu maqola ortida rasmiy Pekin turgan bo‘lishi mumkinligini rad etmayaptilar. Zero, Xitoy hukumati Pxenyan siyosatining keyingi yo‘nalishlaridan norozi va u KXDR bilan G’arb mamlakatlari o‘rtasidagi munosabatlarni yanada murakkablashtirishga urinayotgan bo‘lishi mumkin.

Bundan tashqari, maqoladagi ma’lumotlarning haqqoniyligiga mustaqil huquq himoyachilari ham shubha bilan qarashyapti. Ularning fikricha, bu kabi qatl uslubi hattoki Shimoliy Koreya rejimi uchun ham o‘ta vahshiyonadir.

Oldinroq matbuotda chiqqan ma’lumotlarda, Chan Son Txek va uning safdoshlari 12-dekabrda Davlat xavfsizligi vazirligi binosida otib tashlangan, deyilayotgandi. Ayrim manbalar esa, bunda zenit pulemyotlar ishlatilgani, qatl jarayonida Mehnat partiyasining yuqori mansab egalari qatnashganini aytgan. Ammo bu versiya ham rasman o‘z tasdig‘ini topgan emas.

Shuni ham aytish kerakki, bu – Xitoy matbuoti mazkur mavzuda chop etayotgan ilk ma’lumot emas. Oldingi safarlarda Chan Son Txek bilan birga besh emas, balki yetti nafar safdoshi qatl etilgan, deyilgan. Ayrim ma’lumotlarga ko‘ra, ular orasida ikki nafar Mehnat partiyasi a’zosi, ikki nafar hukumat a’zosi va ikki nafar harbiy xizmatchi bo‘lgan.

Eslatib o‘tamiz, Kim Chen In o‘z pochchasining qatl etilganini Yangi yil murojaatida tilga olib o‘tgan. KXDR yetakchisi bunda, Mehnat partiyasining yaxlitligini buzuvchi fraksionerlardan qutilish kerakligini aytib o‘tgan. Uning ta’kidlashicha, pochchasining qatl etilishi xalqni jipslashtirishga yordam bergan.

Chan Son Txekni mamlakatda ikkinchi o‘rindagi shaxs, deb hisoblashardi. Kim Chen In mamlakatni mustaqil boshqara olmaydigan paytlarda pochchasi uning siyosiy murabbiyi hisoblangan. Rasman Chan Son Txekka davlat mablag‘larini ayollarga va giyohvandlik moddalariga ishlatish aybi qo‘yilgan, ammo buning haqqoniyligi ko‘pchilik ekspertlarda shubha uyg‘otgan. Bir taxminga ko‘ra, uning qatl etilishi sababi – mamlakatning siyosiy hayotiga ta’siri o‘ta kuchli bo‘lganligidir.